赴會參加一個支持本地時裝業的宴會，本人與時裝向來攀不上關係，但聽聞此宴會的地點是禮賓府，於是千方百計覓得入場券。由十多歲開始，每次去蘭桂坊蒲，經過港督府都會暗叫一句：「唔知入面點嘅呢？」每年港督府都會開放讓市民參觀杜鵑花，但又不想日光日白入去迫，只希望有機會可在華燈初上時一睹府內境況。當晚開放的只是樓下的一層，沒有機會潛入前港督彭定康的千金雅思的閨房，懷念雅思的倩影。禮賓府內白牆金邊，舊英式設計，簡單而有氣派，這類建築在香港拆一間少一間，快要絕種。宴會內與友人喝着免費香檳，當然要在洗手間內留下到此一遊，出來時聽見入口處人聲鼎沸，原來是主禮嘉賓特首夫人到場。現場看見特首夫人，真人靚過上鏡，面龐比起電視中所見略為瘦削。特首夫人身邊保安並不是太鋪張，如果當日想請特首夫人食蛋糕的話，應有幾次機會得手，但當然沒有。特首夫人表現得頗親民，除了揮手外，更主動傾偈，特首夫人經過我們身邊，說了一句：「嘩，幾靚喎」，我們自問都經意地扮不經意地裝扮過，梗係以為說我哋，點知特首夫人尾段再加一句：「呢個地方！」然後翩翩離去，幽默得佢？
不止一次聽人說過董特首及特首夫人甚至特區政府的幾位高官其實都係好人，但我們是否需要好人？好人是否適合搞政治？相信再讀多少書也是搞不清。