每個行業都有經紀，連「潮界」都唔例外。「潮界」經紀通常同啲街頭時裝KEEPER（牌子持有人）有偈傾，撮合唔同公司搞合作計劃，計劃出街後就被雜誌稱為CROSSOVER或「別注」，而經紀因利乘便可預早勾啲貨出嚟「轉售」（其他人稱之為『炒』），從中獲利為生。外行人以為做「潮界」經紀好「酷」，其實呢行都係表面風光，箇中辛酸同做一般保險經紀冇乜分別。而本地較為人熟識嘅「潮界」經紀就係前商台DJ組合，佢哋明白娛樂圈花無百日紅道理，所以早已轉行做其「潮界」經紀。
最近行內新上位「潮界」經紀要數「大隻標」，佢做演藝經理人出身，據講同日本「裏原宿」啲設計師稔熟，以「大隻標」以前喺演藝界嘅人脈關係，想搞一番CROSSOVER大動作相信唔難。最近佢就不斷傍住熱愛着Nike嘅殭屍王子，希望借佢名氣拉攏裏原宿啲KEEPER搞合作計劃，「大隻標」經常要陪住殭屍王子出入各日本水貨店，所以狗仔隊偷拍殭屍王子時都唔小心影埋佢入鏡，有時重登埋雜誌。不過未做成生意之前，「大隻標」為表同聲同氣，要陪殭屍王子喺水貨店使巨款買名牌。行內人都慨歎：「做保險經紀最多蝕餐茶錢，但做『潮界』經紀淨係計裝身同玩樂費已經好赤。」
主持人：大食Jack
八卦熱報：