接連兩個星期，本地汽車傳媒可謂忙個不停，繼上周平治邁巴赫（Maybach）正式登陸香港，而三菱全新Grandis亦舉行傳媒試車會；據知新款Grandis七人MPV，除有唔錯口碑外，亦陸續接到唔少客人嘅定單㖭！而今日下午，部有「Baby林寶」之稱嘅Gallardo，亦會跟傳媒同VIP客人初次見面㗎！呢部新車價回落至250萬上落嘅SuperCar，早前預售反應奇佳，相信代理嘉信汽車嘅黃Sir，終於飲得杯落喇！然而，早前一直未見消息嘅愛快147GTA型號，據亞Mark打探得知，隨後又會好快同香港車迷見面；響汽車首次登記稅重新修訂後，呢部用上一台3.2公升V6偈（馬力250匹）嘅房跑車，賣價可維持番原定嘅36萬8千，相信一班等候咗好耐嘅準買家，定必雀躍萬分呢！