本欄半個月前（六月三十日）講過「反對二十三條者比較年輕、學歷高、收入高；支持二十三條者多是小學程度、收入低、年紀大者。」一位讀者來電郵抗議，指左丁山唔公道。呢位自稱「一個已做了奶奶的家庭主婦」Judy話自己只有小學程度、收入少、年紀大，但亦知道二十三條有問題，識得利用手機傳信息呼籲朋友去遊行，自己怕熱，情願熱死，也去遊行。所以Judy叫左丁山唔好話佢呢批人膚淺。
其實左丁山只係引述民意調查數字啫，絕無意思歧視任何人，因為民意調查統計數字講求中位數，利用大數法則去推理。贊成二十三條之中，也有高學歷、高收入（不過年紀較大）人士，如鄔維庸、曾鈺成、梁振英、葉劉淑儀就係表表者。
上述民意調查數字乃七一遊行之前做嘅。遊行當日，中大陳韜文與港大鍾庭耀合作做一個調查，訪問一千一百二十七名遊行市民，發現56%有大專或以上程度，41.3%中學程度，2.7%小學程度，說明咗讀者Judy係少數派，值得尊敬之至。以職業分，遊行人士40.1%係專業半專業人士，20.9%係學生，文員?服務人員有17.5%，主婦有3.3%，工人4.2%，失業退休人士4.5%，其他職業9.1%。
可以講，參加七一遊行者就係市場上最有消費力、最有自主性、唔會俾人誤導嘅一群。所有與遊行者為敵嘅報紙雜誌，想增加銷路，吸引廣告都怕好難咯，懂得市場導向嘅公司產品，你哋知道點做㗎啦！