今次家電減價集中主攻電飯煲、吸塵機等小型家電。呢類濕碎小家電，本身價錢已經唔太貴，要減就一定要勁減先夠吸引，就好似$80一個電飯煲、二百幾蚊一部吸塵機，就絕對令人驚喜，有即時飛身掃貨嘅衝動。
記者：馬慶武 攝影：伍慶泉
Model：Esther(SunSpot)
逢星期一至三出版
除咗有超平嘅電飯煲、吸塵機等小家電，亦有幾款較大型嘅家電減價，不同budget掃不同家電，平貴都有着數。如冷氣機、電視機等，價錢貴啲，減價幅度亦唔及小家電咁勁，不過計落條數每款最少都減咗幾百蚊，而且全屬行貨有保養，重包埋免費送貨，睇啱一樣買得過。
原價$160 特價$80 限量50個
1.5公升容量，雖然只有基本煮飯煲粥功能，但$80蚊就買到個可煮足夠6人用米飯嘅電飯煲，真係超筍。
原價$500 特價$295 限量20把
座枱14吋風扇，只有三段風速調校，功能唔多，亦不設自然風、自動開關、遙控等功能，不過若只求涼快，呢把風扇嘅風力都算幾強勁。
原價$560 特價$280 限量20部
韓國三星製造嘅1400火吸塵機，吸力強勁而且三百蚊唔使，買個返屋企就唔使掃地掃得咁辛苦喇。
原價$498 特價$250 限量20個
煲水溫度達攝氏100度，保證衞生有效率；3.5公升容量，一般家庭夠用有餘。
原價$798 特價$399 限量20部
𠵱家啲大陸牌子DVD機大多數都減到五百蚊樓下，不過呢部菱峯DVD機勁在有色差、光纖輸出，並兼容CD-R、SVCD、MP3等播放功能，加上超薄外形，相信三百幾蚊都已經係最底價。
原價$1,840 特價$920 限量50部
三星t匹冷氣機，賣一千蚊以下包送貨都算好抵，而且買冷氣機重送每張價值$30嘅小熊國入場券兩張及毛公仔兩隻，買完機順便去玩吓都唔錯吖。
原價$1,580 特價$970 限量50部
具備一級能源標籤，慳電效率高，而且保用期長達39個月。
原價$2,180 特價$1,385 限量50部
始終樂聲牌冷氣都較具名氣，而且款式較新，原價亦較高，所以減價後仍要千多元一部。另外，亦有足1匹款式，外形一樣，減價$700後賣$2,255。
原價$1,350 特價$1,040 限量50部
DVD錄影機價錢高企始終未普及，所以用錄影機錄影電視節目始終仍係主流，款式不斷推陳出新都仍有捧場客。據電器消費者中心負責人謝先生講，呢款有6磁頭又有麗音嘅型號就最受客仔歡迎，唔愁去貨，所以只係減咗三百幾蚊。
原價$2,070 特價$1,590 限量50部
如果要買日本名牌電視，千幾蚊只可以買到14吋電視。𠵱家同樣價錢就買到部平面25吋，打機睇碟都係大電視好feel啲，加上TCL都算國內名牌，一啲都唔失禮。另外凡購買TCL25吋平面麗音電視機，都會送一部手提耳筒收音機。
原價$360 特價$180 限量30個
雖然唔係電器，但都係家居必備嘅實用廚具，價錢減半一樣抵買。5.5公升嘅不銹鋼大湯煲，最正係有10年保用，只要係自然損壞都有得免費保用。
Mon：「$80個電飯煲真係聽見都覺得抵喎，撞啱我就快新屋入伙，好彩咩都未買，到時減價嚟買齊飯煲、吸塵機、熱水瓶就啱數喇。」
黎先生：「啲小家電係幾抵，不過我屋企都有用緊，又無壞，所以都唔會買住。房部冷氣機就想換部新嘅，一千蚊唔使送埋貨，都應該扑槌㗎喇。」
減價地點：電器消費者購物中心
（銅鑼灣糖街1-13號銅鑼灣商業大廈17樓1703室/25762368）
減價日期：即日至7月31日