大家唔好以為呢期淨係國企同工業股先至有得炒，由於投資氣氛好咗，唔單止芬佬炒到飛沙走石，散戶參與亦增多，唔少炒家都肯增加彈藥搞旺個場。
上周末打波之際，經紀陳話上星期公布配售新股嘅富豪酒店（078），傳聞有班大戶認晒成批新股，諗住炒番一轉。
由於富豪大老闆呢排肯出嚟曝光，又話歷時4年嘅債務重組就快搞掂，因此估計班炒家會更加多兩錢肉緊，落力炒作。
富豪上周公布，以每股4.8仙，配售1.8億股新股，集資淨額只係區區840萬元，真係好話唔好聽，求其本地一個炒家都可以接得晒。
雖然呢批新股要到下個星期尾先至出籠，但股價已經有反應，成交量亦顯著增加，上周五再升3.45%，收0.06元，認購新股者帳面已賺咗唔少。不過經紀陳話，富豪升勢有機會持續落去。
另外，上市前一度受到匿名信困擾的東瑞（2348），上周五掛牌表現硬淨，收0.83元，較招股價0.80元，高出3.75%。經紀陳話，據講又係有班大陸炒家坐鎮，本周應該有表現。
慕容小初