娛樂圈呢行，同性戀零舍多，我馮仁昭真係見怪不怪。好似某年輕男子組合咁，其中兩個成員都唔鍾意女人。
呢個年輕男子組合入娛樂圈時間唔耐，都重未喺樂壇企穩陣腳，所以呢兩位成員，就梗係想隱藏自己嘅性取向啦，不過唔少娛樂圈同志圈子嘅人，都知佢哋「好嗰味」。
呢兩個後生仔平日都幾貪靚，仔細望吓佢哋個樣，都會發覺有啲乸乸哋。馮仁昭之前其實都聽過其中一個成員係鍾意男人嘅，但原來另一個重犀利，因為佢已經搵到佢嘅情郎，重要係同公司嘅新人嚟㖭。佢哋近排雖然行得好埋，但因為大家同一間公司，外人睇嚟就覺得好正常，佢哋以為咁樣就可以瞞天過海，但其實佢哋嘅關係已經有人知道。
馮仁昭覺得性取向係好私人嘅事，同旁人無關，但如果唱片公司知道咗嘅話，唔知佢哋會唔會俾公司雪藏呢？
張惠妹前晚喺台東海濱公園舉行嘅「就是我想你」夏日演唱會結束後，就同屋企人、工作人員一齊去咗海邊嘅餐館B.B.Q慶功。阿妹好高興咁攞住酒杯滿場飛，重同記者講起細個上山打飛鼠嘅趣事。佢話嗰陣自己同哥哥失散咗，咁就喺草叢等佢返嚟，點知等就等到天黑，搞到兩姊妹驚到要一齊唱歌壯膽。
伊能靜噚日同台灣傳媒講，佢早排喺沙士疫情爆發時，返咗內地拍《畫魂》，老公庾澄慶叫佢為BB着想，唔好咁快返台灣。伊能靜聽咗之後就好激氣，話自己掛住BB，無論點樣都要返去，重激到差啲喺高速公路度跳車。佢話自己年紀大咗，好耐都未試過好似今次發咁大脾氣喎。
噚日凌晨兩點幾，馮仁昭見到曾志偉喺尖沙嘴出現，原來佢啱啱同東魅嘅同事，喺一間叫做「輕鬆一下」嘅食肆食消夜，重食到舖頭閂門先至捨得走，我諗佢可能趁機會同公司同事商量吓公司事務都唔定。志偉臨走嘅時候，重好風騷咁同馮仁昭打呼招，同佢以前飲酒飲到啤啤夫個樣，簡直係差天共地。
張堅庭噚日應香港兒童音樂劇團嘅邀請，喺天后出席「全人戲劇」講座，佢重話政府要員有戲劇訓練嘅需要：「我覺得葉劉淑儀、董特首身體語言差，眼神又冇，講嘢又差。葉太簡直係冇戲劇訓練可言，好多外國啲政治家都有學過戲劇，睇吓葉劉望人態度好似藐視人，內心諗乜就反映出面上，佢同董生真係要惡補。」
