曾有港區人大代表指「唔支持23條就唔配做中國人」，堪稱最敢言的人大李鵬飛昨出席「2003民主大會」發言時，指摘那些以愛國愛港之名反對實行民主政制的人不能與時並進，其實是「害國害港」、「根本唔配做香港人」，獲台下群眾熱烈歡呼和應。但這位敢言的人大代表坦言，不會再競逐下屆人大了。
曾任自由黨黨魁的「飛哥」強調，自己並非下屆特首大熱，「N年N屆，我嘅N係Never（永不），唔會去選，唔會好似某位仁兄，再唔敢講N屆唔選。」
對於親中派指追求民主即不愛國愛港，李鵬飛怒斥他們胡說八道，「話香港唔成熟，唔應該有民主，講嘅人不但不能與時並進，根本唔知道世界上發生緊咩事！呢班人根本唔配做香港人！」他又批評七月一日後特首未回應市民訴求，「你睇下之後幾日，二號『早晨』，三號『早晨』，四號『早晨』！一位領導如果係聽到人民嘅訴求，係即時回應人民嘅訴求！」
他認為若非自由黨主席田北俊辭去行政會議職務，7.9當日很可能「血洗中環」，顯示為政者不了解人民的訴求。他以南非的曼德拉和緬甸的昂山蘇姬為例，指民主不是禮物，需要大家齊心爭取捍衞才有將來。
李鵬飛稱，不擔心因批評特首開罪北京，事實上特首半年來也未聯絡過他，「冇所謂啦！」他說自己熱愛香港及信奉民主，才想看到港人能自由選舉自己的領導人。
本報記者