專家教路綠葉搶鏡秘笈
伊東跳脫衣舞報答捐腎恩人

我大口羅拉除咗同啲師奶一樣，好鍾意睇日劇同韓劇之外，其實亦都係一個影癡，對於外國有乜好戲上映都好留意。好似上年我喺香港國際電影節，睇咗由松田龍平主演個套好cool嘅校園片《藍色青春》，就好留意導演豐田利晃嚟緊有乜新搞作。

松田龍平擔正
原來佢喺呢個星期六有一套新片《NineSouls》喺日本上映，重搵咗人氣靚女伊東美咲扮脫衣女郎，一定吸引唔少麻甩fans捧場。
查實《NineSouls》已經係伊東第四部參演嘅電影，不過佢今次同松隆子、今宿麻美等女星都係套片嘅綠葉，導演就再搵愛將松田龍平做主角。

勤力通宵排舞
聽講套片係一套公路電影，主要圍繞龍平同八個犯人逃獄嘅經歷，其中有場戲就係講一位捐咗個腎畀伊東嘅逃犯同佢喺脫衣舞池重遇，聽落都覺得好鬼浪漫同感人。
另外，第一次扮脫衣女郎嘅伊東，好緊張自己嘅表現，喺電影開拍前，佢就搵咗專人學點樣跳脫衣舞。
伊東亦好勤力咁通宵排舞，而且喺部戲入面重會好大膽咁慢慢脫衣，最後脫剩內衣大騷身材，相信到時會有好多麻甩fans捧場。