OLYMPUS新一代專業級機王E-1，終於在香港現真身！此機是OLYMPUS首部行加大碼4/3CCD系統，500萬像素級嘅數碼單鏡反光機（D-SLR），而且不同於過往旗艦機E10及E20，首度加入可換式鏡頭系統，絕對是OLYMPUS迷望穿秋水之作。
記者：朱崇德
攝影：陳偉強
攞上手第一個感覺係同E10、E20有八、九成相似，鏡頭一樣偏左，右手把持位一樣咁好揸，淨重660克唔覺好重，鎂合金外殼夠實淨又有質感。E-1是首部加入4/3系統，具備500萬像素嘅數碼單鏡反光機，呢粒CCDSize相當嚇人，貼近於APS菲林底片17.8×13.4mm，較現時高階數碼相機所流行嘅1/1.8"及2/3"CCD系統，差唔多大咗4-5倍，所以在感應光源以至成像效果，都絕對達專業級水準！嶄新的減少塵埃系統，在CCD前加上SupersonicWaveFilter，以超聲波的震動除去濾鏡表面塵埃，解決數碼機換鏡頭時，因CCD外露引起嘅「吸塵」問題，極有諗頭！
E-1拍攝反應明顯有長足進步，新加入3ASICs系統，將相片成像、數據傳輸及相機操控三方面，分別由3粒IC獨立處理，所以各功能嘅反應都明顯較上代快好幾倍！更厲害係內置Buffer足128MB，就算影500萬像素嘅相都係隨㩒隨影即Save，唔使半秒！可以每秒3張連拍12張最高解像度相片，連拍時重有追焦功能，準確程度絕對達到專業級水準。
E-1機價幾多？
由於E-1要10月先派街，問到售價，香港代理三緘其口，不過日本資料預計價格約$2,199美元，約港幣$17,150！喂！唔好驚住，以香港行貨慣例機價會減三成，再加上行貨由香港OLYMPUS做番，可再減7%，所以DC場中人估會在$10,000左右。
為配合此機可換式鏡頭系統，特別開發了4支專為數碼相機而設嘅ZuikoDigital鏡頭，能令進入鏡頭內的光源，以貼近完全垂直的角度，射在CCD感光元件上，可有效降低失光情況，完完全全發揮出CCD的效能！4支鏡頭分別為14-54mm/F2.8-3.5、50-200mm/F2.8-3.5、50mm/F2.0及300mm/F2.8。據知OLYMPUS有意將此機和鏡頭系統開放給第三廠開發，網上流傳Kodak有機會成為第一個合作夥伴。
OLYMPUS兩部10倍光學變焦大炮王C-750UZ同C-740UZ，行貨版終於落場，C-750UZ係現時UltraZoom系列頂級機，400萬像素，機頂有熱靴位，Movie模式可即場收音，破例跟機送埋無線遙控。C-740UZ320萬像素，內置閃燈，是入門平價之選，Movie不設收音。
μ[mju:]400係一部超輕巧全天候機，機仔細細但有400萬像素，使用好爽利，一推開鏡頭蓋2秒就快速啟動，鏡頭有3倍光學變焦，香檳金金屬機身，竟然連鏡頭位都做埋防水物料，下雨天都一樣可以照常拍攝，細機有咁嘅功能，市場上真係冇乜邊部同佢有得揮。
OLYMPUS查詢：27301505