歐洲足協為咗加強歐冠盃以外其他盃賽吸引力，早排就為足協盃諗計改賽制。其實有時佢哋個配套唔掂，球迷想關心呢啲盃賽都不得其法，至係根本問題。
好似圖圖盃咁，又點解唔搞好啲呢？尤其𠵱家呢個檔期，當中亦有最為人熟悉嘅四大聯賽球隊參與，實有一定吸引力。可惜個官方網，連最基本嘅各隊出場陣容，以至現場比數等資料都做唔到，搞到我哋要靠晒嗰啲非官方網。但始終都係非官方網，經常出現混亂情況，好似前晚咁，有好幾場比賽，網上嘅即時戰果都出現不同版本，都唔知信邊個好！
咁唔重視，咪唔好搞圖圖盃囉！
列斯賣埋基維爾後再冇乜球星，結果領隊列特走出嚟講，話佢哋可以唔使再理財政狀況之下去買人，並且有傳中田英壽同基巴臣都係目標，結果係俾傳媒當笑柄，形容列斯要奇迹搭夠先至買掂，又係嘅，如果買到呢兩個人嘅話，就使乜放走晒班好球員呀！
碧咸喺皇馬嘅首場比賽，日前有消息話係對甲A球隊雲南紅塔至真！不過碧咸可能都未必會喺呢場波首披皇馬戰衣上陣，事關紅塔話因為兩軍實力差距太大，希望到時朗拿度及碧咸幾位主力，會「調轉槍頭」替佢哋上陣對番皇馬！如果真係咁，呢場波同普通皇馬操練分隊賽有乜分別？
五十七歲嘅佐治貝斯繼上年因為酗酒差啲冇命後，上個禮拜六又因為喺酒店涉嫌打鬥，同另一個三十一歲男子一齊被捕，但好彩警方冇起訴佢。而差不多同一時間，加斯居尼亦同離婚老婆再結婚，又喺兩個仔面前發誓戒酒，洗心革面……人生如夢，希望兩個麻煩友之後自愛啦！
今屆環法賽已經贏咗四站嘅佩塔基，噚日喺爬山賽賽咗大概五分一賽程就棄權，惹嚟唔少批評，雖然呢位只擅長賽平地嘅意大利單車手解釋，話早知自己冇狀態完成比賽，棄權只係遲早事，不如省啲氣力！我求大俠真係唔知話佢「精」好抑或「縮骨」好，但睇怕就冇乜體育精神啦！