𠵱家發展商賣樓，左搞右搞都賣唔晒，為咗要賣得快，有時都要信吓風水，求個心安同希望。電盈嘅薄扶林貝沙灣，第一期起五百四十四個住宅單位，零丁得嚟又「死」「死」聲，好似唔多吉利，但蘭西聽坊間傳言，係經高人指點，用紫微斗數算過至咁起，唔怪得個盤可以去得咁快啦，未夠半年已經差唔多賣晒。
蘭西記得，新地嘅跑馬地禮頓山，好似都係得五百四十四伙，樓盤一日賣清，收成九十億。睇嚟電盈都想好似新地賣得咁好。另信和屯門海典軒都係得五百四十四伙喎，乜又咁啱嘅？
不過，蘭西請教過風水高人蘇民峰師傅，佢就話冇咁嘅可能，因為五字喺風水術數嚟講，係屬於「五黃」，即係病符咁解，真係唔吉利。而風水學根本唔注重單位數量呢樣嘢。
近呢個幾禮拜，樓市氣氛進一步向好，發展商嘅口風即刻轉晒軚，揚言新盤唔減價之餘，重開始話要加價㖭。
其實𠵱家樓市呈兩極化，百零萬嘅上車盤，或者係千萬元以上嘅豪宅，承接力都唔使擔心，咁啱近排推出嘅，都係呢類單位，所以咪覺得個市好咗囉。發展商出埋口術，睇怕都係銷售手法，同買家打心理戰，希望想谷旺個市就真。
上個禮拜金管局話3至5月樓價跌咗八個巴仙，暗示銀行要留心，可能有業主會斷供。
上海樓盤廣告近年放棄花巧作風，改以清晰直接嘅手法。從舊年嘅樓盤廣告，可以歸納出幾個特色。首先係廣告用語直接淺白，例如金色家園用「南京路和我有關係！地鐵站和我有關係！蘇州河和我有關係！」，單呢幾句話，就佔咗全版廣告差唔多一半。
另一種就係有連貫性，如東苑綠世界三期，由樓盤動工到開盤嘅進程拍了四輯廣告。而御墅臨楓，就以「拒絕負擔」、「拒絕煩瑣」、「拒絕等待」、同「拒絕總會有收穫」等一組廣告，惹人注意。
原來樓盤廣告有咁多學問，蘭西好想知道本港發展商喺內地賣樓，啲廣告內容同形式又係點嘅呢？
七月份住宅樓市焦點，當然落喺新地元朗YOHOTown。
樓盤前周日內購出現人山人海嘅場面，銷售成績又創今年紀錄。蘭西聽啲地膽代理行講，佢哋都有收到大行邀請合作，帶客去揀樓，咁即係話艇仔都齊齊出力。對於發展商嚟講，最重要都係賣到樓啫，只要秩序良好，應該唔介意嘅。
代理趁機盡力促銷，個別喺做生意之餘，自己重入埋市。聽講利嘉閣有經紀同親人，買咗兩個單位自住。呢啲個案，絕對係sell客嘅最佳人辦。
另外，新地專為YOHOTown而做嘅銀色風褸，十分型仔，新地重送咗啲畀傳媒，唔知係咪等大家着住，時時記起呢個盤。
蘭西
電郵地址：