大市調整而向個別發展，芬佬就話個市回唔落，調一調整，又會再衝過，個人認為恒指衝破上一個浪高位10247後，去到10400至10500水平，先會出現中期調整。
無論係投資抑或投機，國企股都係今年嘅主流，鋼鐵股急升後，下一個浪又會輪到石化或者公路股，總之，下半年國企重會輪流接力而上。升到幾時？QDII出台，都只係一個中途站，之後重有排上。早輪講過，芬佬特別看好鋼鐵股，話明股價重可以翻一番，當時馬鋼（323）亦只係1.2元而已。
除咗國企，科技股亦成為追捧對象，好多呢一輪都升咗兩三成，𠵱家再落注，搵未點大升過嘅上車，贏面更大。冠軍科技（092）上個禮拜有異動，收1.32元，但只係企喺上月中嘅高位水平，PE亦只不過4倍，偏低股一發力，隨時會一飛沖天。其實，睇周線圖，由去年7月開始，冠軍成個大型嘅收集形態，上個禮拜出現重大突破，重上50周線，而10周線又將升越50周線，升破1.35元，照度上去，最小升幅目標係1.75元。
一向幾可靠嘅中資消息話，大陸資金除揸重國企外，亦郁緊幾隻三四線股，聽講已收集到八八九九，隨時會開車，其中一隻就係佑威國際（627），今年4月底，佢哋小試牛刀，幾日之間，股價由0.22元急升到0.37元，升幅超過6成，之後消化咗兩個月，佢哋亦買足兩個月。
集團主要產銷便服，零售市場早輪受非典打擊，佑威銷售亦下跌10%至30%，但佑威卻接獲數以百萬計的納米口罩及保護袍定單，抵銷便服銷售下跌影響，集團亦因此打開了納米醫療衞生產品市場，增添盈利來源。
佑威有一隻認股證591，9月12日到期，認股價0.45元，公司需要資金加建納米產品工廠，若能成功令認股證全數行使，確可解決資金問題，因此，佑威股價上升有誘因。
佑威走勢形成一個大型楔形，近日調整完成，股價重上3條平均線之上，楔形降軌阻力0.325元，一破位而上，大升浪即可確認，量度上升目標為0.47元，預期升幅達50%！
郭兆誠