全球第三高摩天大廈、國際金融中心二期已經落成，發展商新地日前特別搞咗一個活動，請傳媒到該廈嘅七十一樓，睇睇呢幢高廈嘅景觀到底值幾多分，八方當然要先睹為快。
由於樓高八十八層嘅國金二期高達一千三百二十五呎，等於老襯亭咁高，八方雖冇去到頂層，但身處逾一千二百呎高空，果然有大地在腳下嘅感覺，可以遙望竹篙灣迪士尼嘅地盤。
新地董事黃植榮負責搞呢個項目，足有七年時間，佢同八方講解大廈嘅特色，原來佢哋想包裝國金二期做「新中環」，佢覺得中環填海計劃完成後，由灣仔經新路到中環，最直達嘅地點係國金二期，加上地鐵喺二期闢有出口位置，由蘇豪區行天橋到國金，全程都有有蓋天橋，所以可視作中環心臟。
國金二期原先設計有一個觀景台，但後來新地都取得九龍站地盤，重搞到一百零二層高，故此決定喺嗰邊設觀景台，畀遊客欣賞吓香港呢邊嘅美景。
（圖）樓高八十八層嘅國際金融中心二期，係全球第三高摩天大廈。
傳真︰2623-9278
電郵︰