隨住手機步向多媒體，連帶手機遊戲都愈嚟愈多元化，不過跟機通常都係得一兩個遊戲，又點夠玩？再加上GPRS收費愈來愈平，各個網絡商都推出遊戲下載服務，由射擊、賽車、運動、智力式式俱備，今日一於嚟個街頭突擊，睇吓邊款遊戲先係玩家至愛！
記者、攝影：劉耀祥
Jeffrey同Steve兩兄弟閒時都會Download手機Game玩，賽車就最啱胃口，大佬對《ExtremeSpeed》至為喜愛，最高紀錄試過連續玩兩個鐘，直到部機冇電，不過其NECN8不支援Java，所以惟有問細佬借部Nokia7250玩。細佬就對格蘭披治賽車情有獨鍾，《GlobalGrandPrix》雖然唔夠屋企電腦咁刺激，不過坐車等人要嚟止咳都相當唔錯。
阿寶自言並非超級遊戲迷，買咗唔夠一星期嘅3300主要用嚟聽歌，遊戲只係Download過一、兩個，不過《泡泡龍》就令阿寶一玩上癮。「以前喺機舖都見過，不過冇乜點玩，見個名都識就試吓，玩玩吓覺得幾好玩。𠵱家坐車或者得閒無聊就攞嚟玩。」
雖然Stanly仍喺求學階段，不過玩得最開心嘅竟然係《打工仔復仇記》，遊戲以打老闆出氣為目標。「自己一向鍾意玩畫面得意嘅，雖然𠵱家未有老闆，不過唔開心打幾拳都可以出吓氣，令自己心情好番啲。」
閒時鍾意做運動嘅阿昆，當日啱啱同朋友打完波，估唔到手機都係運動Game。「呢隻Olympic好好玩㗎，項目又多，又有短跑、跳遠同推鉛球等，一個Game玩晒，可以挑戰吓自己。」除咗奧運外，小記發現手機重有滑雪同排球等，果然係一個運動愛好者。
女性多用遊戲消磨時間，玩法簡單、唔係太刺激就最啱。Doris覺得配對遊戲《Matchem》就相當適合。「佢係我第一個Download嘅遊戲，手機內置嗰啲唔係咁啱玩，不過$15就貴咗啲，$10就更好。」