𠵱家手機月費已經好平，百零蚊就有成千幾分鐘，不過羅新基身邊啲朋友就個個月都要畀成五、六百蚊月費，因為個個月都打到爆晒廠，淨係計額外通話費已經有排計，不過最近PEOPLES同新世界就連額外通話費都玩殺價，以往最平要成幾毫子一分鐘，𠵱家就減到$0.1一分鐘，以後就算打爆額都唔使再頭痕。
一推再推嘅3G，據聞8月就會正式開波，推遲嘅原因有傳聞係網絡硬件同新3G機唔夾，所以要全套換過，搞到由之前講嘅6月尾變到8月。傳聞第一批3G手機NEC嘅E606，外形與現時之N8差唔多，機面已經有大大個「3」字，一睇就知係3G，最大分別係機外機內都有鏡頭仔，將現時影相手機功能又再推上一層樓。根據英國「3」的資料顯示，E606賣緊399英鎊，約港幣$5,000，若果照跟嘅話都算抵玩。
SMS已經相當普遍，輸入已經成為手機相當重要的一環，曾經參與設計P800鍵盤的DigitWireless就設計出一款新鍵盤，將英文字外置在數字鍵旁邊。雖然個樣就怪啲，不過Panasonic已經睇中呢個設計，重以GD87改裝測試，不過幾時有得賣就冇人知喇。
文：羅新基