有傳Edison父親經營的生意出現財政困難，他需不斷工作代父還債，因此承受了不少壓力，對此，平日絕口不提家事的Edison皺着眉頭說：「我一向唔講屋企，不過我同屋企人感情好好，總之屋企有事，我會盡量去幫。
「呢輪好多知道我唔開心嘅人都叫我takeiteasy，所以我都盡量會叫自己睇開啲，因為我都明白唔係我能力可以解決。有時我諗，自己只不過出道三年，中、港、台都發展得唔錯，有咁多機會拍到好戲，總算有啲安慰。」
而性情率直的Edison，今年初在紅館一個樂壇頒獎禮幾乎與余文樂大打出手，但這兩個宿敵最近剛合作完《無II》後，為了今屆港姐，二人又在泰國相處了好幾天，對於他與余文樂的關係，Edison輕鬆地笑說：「我同佢咪係forbusiness嘅關係，一齊做嘢冇乜問題，又唔係有仇，但我開party唔會叫佢，打電話同朋友講心事，唔會搵佢，要約朋友食飯亦唔會諗起佢囉！加上我講英文，佢講中文，唔係咁啱傾。圈中嘅男性朋友，我同霆鋒、Eason（陳奕迅）比較傾得埋，女性朋友當中好似BoBo（陳文媛）同MaggieQ等都係我嘅好朋友。」
當Edison遇到不開心時，喜歡找父親或信任的朋友傾訴，但他說：「有時明知講出嚟件事係解決唔到，我寧願選擇同屋企隻狗講心事，又或者寫歌詞同畫畫去紓緩壓力。」