屯門公路發生巴士墮橋慘劇，首批到場救援的荃灣消防局消防總隊目梁偉成，忘不了令人哀傷的情景。他當日早上原本已連續工作近二十四小時，但接獲車禍報告後立刻又要全力投入救援工作，連穿着的靴子也裝滿了汗水。不過，體力透支還是其次，梁偉成感覺最深的是：「今次死好多人，真係好傷感……。」
入職消防處二十七年的梁偉成昨接受訪問，憶述當時情況說：「嗰朝差唔多天光，聽到話有巴士意外，心諗最好係『流料』。點知去到屯門公路橋頂，已經見到有架貨櫃車，望落去重有人揮緊手，有架巴士喺下面。」
他續說：「當時個心『打個突』，都覺得震驚，只希望阿彌陀佛，少啲乘客受傷。於是即刻報上總部，要求增援……。」
二十七年的消防生涯中，梁偉成見過死者肢體殘缺、腦漿溢出的場面。他覺得今次車禍死傷情況並不恐怖，但卻感到非常傷感。他說：「見到咁多死傷者，就算係鐵石心腸都會難過，尤其睇到電視，死者家屬喺富山殮房認屍嘅場面，最傷感。」
荃灣消防局高級消防隊長程錦榮也是首批到場救援的主管人員之一。他講述當時的拯救工作說：「到現場見到架巴士瞓喺度，十幾個傷者被架車壓住，初步估計有三十個傷者……車尾有兩、三個受傷冇咁重嘅，爬出嚟等我哋救援。當時首先要固定架車，同埋評估較輕傷嘅，救佢哋出嚟，先救咗啲有知覺嘅。」
他指今次意外是他任職消防七年來，所見最嚴重的交通事故，「感覺好震撼，對於同事喺拯救時嘅忘我精神，我覺得好驕傲。」
記者：黎國剛