過氣天后成日自以為同靚仔巨星好熟，但係圍內人都知道靚仔巨星近年嚟已經唔多理佢。
早幾年靚仔巨星的確係對過氣天后照顧有加，兩個人感情係幾好，但年幾前靚仔巨星請佢返屋企同班老細級人馬食飯，點知佢飲醉酒喺度發晒癲，得罪晒啲人，靚仔巨星呢個主人家梗係好唔高興，因為過氣天后已經唔止一次醉酒失控。
靚仔巨星自此疏遠呢位醉酒天后，加上佢一向好自愛，嫌過氣天后唔多自愛，所以冇乜必要佢都唔見天后。不過，佢都覺得過氣天后心地唔壞，只係太鍾意鑽牛角尖同盲目幫人，先會造成天后今日嘅悲劇命運。
張惠妹噚日喺佢家鄉台東嘅海濱公園開露天演唱會，吸引五千幾個歌迷到場，阿妹嘅家人重喺台下幫阿妹打氣。
阿妹噚日曬到隻手臂甩皮同紅晒都冇怨言，佢唱《說傻話》時，特別拉咗個男歌迷上台，喺佢耳邊情深款款咁唱歌，搞到個男歌迷當場面紅，台下嘅觀眾重尖叫。
陳伶俐、麥潔文、麥長青噚日都帶咗自己嘅仔女去旺角新世紀廣場出席「好孩子暑假電影欣賞」活動，而陳伶俐老公林敏驄同麥潔文老公江華都唔見人，原來啲男人要去做嘢，所以就唔得閒陪仔女，陳伶俐話：「老公遲啲重要拍廣告，可能會同女仔咀咀，我個心都好矛盾，唔知去唔去監場好。」
薛家燕同安德尊噚日去九龍塘一間幼稚園拍MV，家燕姐話個細女見到佢同哥哥瘦身咁成功，所以話要一齊去減肥。對於李司棋日前因疑被跟蹤同收恐嚇信而報案，家燕姐話自己未發生過呢啲事，但係喺佢瘦身之後就收過性騷擾電話，對方不停發出唞氣聲，家燕姐就好唔客氣叫對方去死。
楊怡噚日喺沙田為某化妝品擔任模特兒，佢話今次酬勞好滿意，而且重可以任用呢隻牌子嘅化妝品，認真慳唔少，遲啲佢會返內地拍劇。問到緋聞男友洪天明會唔會去探班，佢話：「朋友唔使日日見，不過我會問我身邊嘅朋友會唔會上嚟探我。」
