老友M做咗馬會賽馬會員（racingmember）幾年，今年搵到相熟遴選會員提名做全費會員（fullmember），甚為雀躍，交廿幾萬入會費，冇問題之至。點知收到會籍部通知，話佢個名入咗「等候名單」（waitinglist），但又冇講要輪幾耐噃。
老友M問左丁山：「知唔知要等幾耐？」左丁山對此冇研究，於是轉問知情人士。知情人士話：「最少要等兩年，排咗隊先啦，唔係好耐啫。」原來馬會全費會員有萬一二人，馬會認為已經相當多，要控制在此數目，要有全費會員過身、自動退會、移民放棄會籍等等，先至從「等候名單」中搵人補上。
咦，咁等法，點止等兩年就掂呀？當然有過往數字作參考啦，呢日左丁山睇沙田馬會會所通告，立即向老友M報告：「喂，怕且唔使等咁耐噃。七月份退會人士有十六個，好似係近期新紀錄，個個月有咁多人退會，等候名單就會縮短啦！」因立場唔同，戥老友M歡喜啫，呢啲歡喜係建築於他人痛苦之上。金融風暴後，左丁山留意到馬會每月宣佈退會人士名單，總有七至十個，七月份嘅十六個，似乎係一個高峯。十六人之中，左丁山識得好幾位嘅名字，其中一人據知已經破產，另外兩三位為馬主，曾威風一時，一位更在地產界廣為人識。我哋小人之心，認為入馬會咁難，如冇特殊原因，邊會退會㗎，而且馬會宣佈「退會」，另有一層意思，大家心照。回歸六年，一切陰乾陰乾，唔知陰乾到幾時。