日本藝能界捧紅一個新人嘅方法同香港都幾唔同，佢哋可以先幫個寂寂無聞嘅女星連續咁出十幾本寫真集，令各大唱片公司同電視台留意，然後至安排啲小角色畀佢哋做，小池榮子同安西纊子呢啲熟悉嘅名字，都係靠咁冒起。
我羅拉今日想講嘅十七歲小妹妹加藤夏希，其實佢只係出到第五本寫真集，但近日有行過日本書屋嘅人都可能知道，加藤一口氣出三本寫真，包括《Privee》同《夏希十七歲、再多一個大逃殺》，重有下個禮拜五（二十五號）先出街嘅《BeautyGenius~美女》，呢排翻開日本報紙雜誌，想見唔到加藤都幾難！
不過大家唔好以為同時期出三本寫真，會自己打自己拖低銷量，日本人好叻marketing，三本寫真各有唔同主題：《Privee》係顯示重係學生嘅加藤純情嘅一面，單睇佢同狗仔玩個樣，好似純過蒸餾水；但《夏》就係介紹加藤拍《大逃殺2鎮魂歌》時，小妮子即刻變臉，係咁殺人唔眨眼，都咪話唔驚；而加藤喺《Beauty》就搖身一變，化身風情萬種嘅熱帶女郎。
加藤一人分飾鄰家少女、殺人魔鬼同性感女郎，呢種大包圍嘅方法，大小通吃，唔同層面嘅男fans都會有機會俾佢「擊中」！