搞到五十萬人7.1上街，呢隻大鑊老董一定孭硬，但有政府高層同八方講，政府入面嘅「雙曾」一樣難辭其咎。「雙曾」唔係指曾蔭權同曾蔭培呢對「文兄武弟」，而係一對曾鈺成、曾德成兄弟。
曾鈺成以民建聯主席身份加入行會，有政府高層形容，比起田北俊，董對曾更加言聽計從。連傳媒都發現，曾主席每次公開講有乜意見，冇幾耐就會成為政府政策。
就以今次23條為例，民建聯要求7.9立法，已經係行會嘅公開秘密。7.1之後雖然田少建議押後，但曾鈺成反對，重講咗三項修訂，最後老董例牌對曾嘅建議照單全收，連田少都冇面畀。咁搞法，唔怪得連一啲商界人士都覺得有問題，先會默許田少「玩嘢」。
至於曾主席細佬曾德成，雖然佢只係中央政策組顧問，但比起首席顧問劉兆佳，似乎更得老董信任。有中央政策組顧問同八方講，早期大部份中央政策組成員支持要出白紙草案，但曾德成反對，最後老董聽咗邊個講，大家都好清楚啦。甚至連撰寫施政報告、預算案咁大件事，負責最後校對、定稿、甚至睇住付印嘅人，都唔係佳叔，而係曾顧問。曾德成一直反對押後立法，又認為7.1唔會有好多人上街，今次呢隻鑊又點少得佢？
有商界老友話齋，政府管治只有兩個字──「平衡」。𠵱家老董聽埋一邊，咁搞法遲早變「土共治港」、「雙曾治港」，中央一定要正視。
傳真︰2623-9278
電郵︰