大市上周波幅真係幾大，以全個星期表現嚟睇，雖然恒指有275點進帳，唔算冇料到，但比起一啲升到癲晒嘅科技股仔嚟講，真係小巫見大巫，尤其幾隻完全係純炒嘅科技股，好似科聯系統（046）、宏昌科技（061）同四通電子（409）咁，聽班行家講，呢次升勢基本上並無任何新消息配合，只係趁住外圍市炒電腦科技股，班大戶就借勢將呢批平時細眉細眼嘅股份挾高。不過，當年科技熱潮嘅盛況暫未出現，可能因為今次嘅科技炒風嚟得太快。
睇番幾隻被炒起嘅股仔，尤其係隻科聯系統，上周五臨收市重有人繼續維持秩序，照睇個勢似乎升浪重未玩完。據聞有班實力炒家喺升破1.5元阻力位後，先至開始跟入，入貨價唔平，照睇隻股一日唔上番個八樓上，沽壓應該唔會好大，有冒險精神者，不妨睇吓有冇機會喺低位撈貨，但若見勢色唔對，當然要識落車喇。
早排伏勝同行家食飯，行家甲講開今次個市升到咁癲，除咗首長寶佳（103）外，其餘幾隻有「藍燈籠」稱號嘅首長系股份重未有所行動，個市應該未升完。不過佢都未講完，另一位行家就話，除咗首長四方（730）之前傳聞會有注資行動外，聽講連隻首長國際（697）都話有嘢搞，不過就唔知係乜。行家甲聽到此話後，即刻大叫個市離頂不遠喇，轉軚速度重快過某啲議員。
伏勝就覺得，個市喺國內閒資充裕下，應該冇咁快玩完。不過，既然傳聞已經落到去首長系，遲早都會玩到佢哋，各位若有閒錢又唔想高追科技股嘅話，不妨趁低位入番多少。
伏勝