昨日有報道指查小欣本來獲邀做有線娛樂新聞台嘅主播，點知被商台阻撓，最後推咗，不過當佢知道同樣係商台主持嘅吳君如執佢二攤後，就覺得好唔公平，重要求商台賠償佢五十萬年薪嘅損失。
查小欣噚日喺商台節目度話，其實佢三月開始同有線傾合作，不過商台叫佢唔好做，所以推咗。查小欣重好大聲話自己身價何止五十萬，應該係五百萬喎！不過如果有人肯賠償佢嘅損失，佢都唔拘，但就澄清絕冇不滿商台。
不過馮仁昭噚日同有線揸弗人徐小明傾電話，佢話有線最早係斟吳君如嘅，所以君如絕對唔係執人二攤。
馮仁昭重收到風，其實係查小欣主動接觸有線，話有興趣做主播，於是有線先試吓同佢傾，不過後尾就擱置咗，根本雙方連合作形式同價錢都未傾過，查小欣唔知憑乜嘢要求商台賠償呢？至於佢自訂嘅五百萬年薪身價，又唔知邊間電視台肯畀呢？而商台對外事務部就話查小欣從冇要求賠償。
許茹芸噚日喺跑馬地綵排音樂劇《我愛宋詞──好風如水》，佢喺套劇入面除咗唱歌外，重要跳現代舞。許茹芸話細細個就好鍾意同詩詞歌賦有關嘅嘢，讀書時除咗中文之外，幾乎科科唔及格。佢重話今次嚟香港，最掛住係屋企隻兩歲大嘅狗。
導演李安噚日喺台灣宣傳由佢執導嘅電影《變形俠醫》，佢話自從呢套戲開拍後，同阿爸、阿仔嘅話題都突然間多咗。李安用國語話：「以前我總是拍女人哭哭啼啼的電影題材，連《臥虎藏龍》都是以女人為主，兒子都不太有興趣，他寧可看吳宇森，但這次拍漫畫，我們可以談談，連父親都看得開心。」
關心妍噚日喺廣州舉行簽名會，有百幾名fans圍觀，全程重有十幾名保安維持秩序，不過居然有fans攞住張翻版碟畀佢簽，啲保安見係老翻就即刻攔住個fans。關心妍噚日重話佢媽咪好驚內地有蚊患，所以一定要佢貼蚊貼，搞到佢暈暈哋。
珈潁噚日出席亞視生日會，見佢手臂上有個紋身，原來佢之前去咗韓國為節目搜集資料，重有幸同韓國人氣男星宋承憲合照㖭！珈潁話：「遲啲我同張達明主持節目，我咪專誠去搵料囉，第一站就係韓國，而手臂上嘅紋身係假嘅。」問珈潁有冇俾人博懵，佢話：「有呀，啲韓國男人好粗魯，影相一手就捉住你。」
