港府今年真係頭頭碰着黑，沙士已經搞到一團糟，23條立法又衰埋，填海工程訴訟又俾環保人士贏咗，噚日連公屋租金訴訟亦輸埋，呢單官司可能導致港府每年少收50億元，相信單係批准賭波都救唔到財赤，不如將娼妓亦合法化收稅啦（純粹係諷刺話，咪錯誤理解為阿虎嘅真正立場）。
今次香港就算冇出現阿董班子管治危機，單係財赤已令香港信貸評級有壓力，最終唔知會否導致資金外流㖭。港股近日於萬點大關受阻，似乎進入調整期，但大戶持有不少好倉，一旦拆倉，後果都相當嚴重。恒指收報9911，跌71點，成交84.92億元。
黑客叫阿虎要留意唯冠國際（334），因為此股可能會進行配股，然後再炒上。唯冠主要生產LCD顯示器，與冠捷（903）業務類同，賣點是電視機行業將有重大變化，顯像管電視漸漸式微，LCD電視及Plasma電視將成主流。LCD電視暫時以價錢取勝，若技術進一突破，效果可媲美Plasma。唯冠與冠捷隨時會搶攻電視機市場，前景與發展空間值得憧憬。冠捷早已是基金愛股，而唯冠亦開始有基金垂青。
早前否認私有化嘅亞太衛星（1045），最近股價又出現異動，過去9個交易日累積升幅65%，昨日收報3.50元，重高過上次炒私有化時水平。不過，公司依然話冇料到，不明升因。
Cookie話，此股基本上係一隻高科技收租股，盈利增長前景只係一般。不過仍較本地投資物業股吸引，美國科技股復甦，呢類股份點都行得快過投資物業股。
阿 虎