借美股回落，港股調整一吓，消吓熱氣，個市未玩完，遲吓再有升勢，喺低位揸Call輪，乃係搵米之道，咪咁快搞啲Put輪住。
中移動（941）收20.05元，跌40仙，等回軟多幾格，吼相關Call輪。跌幾格代表股價低過20元，代表跌破2字齊頭心理關口，但唔代表從此跌落去。個市市底好，跌落去又會有趁低入市嘅買盤出現。中移動Call輪對象有9706同9754，前者下月到期，現價12.5仙，溢價3.5%，槓桿率16倍，後者9月夠鐘，現價37.5仙，溢價1%，槓桿率5.3倍。想穩健投機，買9754；想搏殺，則揀9706。
聯通（762）亦跌15仙，收5.60元，吼低位炒Call輪9383，呢件仙輪，得番兩個月玩，槓桿率夠爆炸，溢價唔低，行使價5.88元，𠵱家係價外輪，最後跌到唔值錢嘅機會存在，炒9383千祈咪坐盤坐得太耐，只適宜速戰速決。
華能（902）再升20仙，收10.35元，又創收市新高。芬佬買貨好似唔使本咁，股價愈升愈有，Call輪9872明年6月到期，現價2.30元，溢價3.2%，槓桿率4.5倍，都重係諗得過嗰隻。另1隻9728，輪價3.875元，9月到期，溢價0.2%，槓桿率2.7倍，則槓桿率唔得吸引。
章 盛