荷李活青春喜劇《美國處男》系列嘅頭兩集大放笑彈，今年電影公司再接再厲，第三集《處男有喜》亦同上集一樣，安排喺下月初美國暑假第二檔期上畫，我羅拉都想睇吓已經要成家立室嘅幾位主角，今集重有乜騎呢搞作。
其實今集嘅內容一如其名，主要講由積遜碧斯（JasonBiggs）飾演嘅戇居主角阿Jim，同佢女友Michelle終於要結婚，佢哋搞婚禮嘅過程自然製造出唔少有味笑話。好似阿Jim喺餐廳向女友求婚，但又唔敢開口，Michelle竟然以為佢想「出火」，當眾捐落枱底剝咗男友條褲為佢服務，搞到阿Jim醜態百出。
不過我覺得至出位嘅都係早排同周潤發合作《刀槍不入一僧侶》嘅尚威廉史葛（SeannWilliamScott），佢扮演嘅鹹濕角色「硬條」，今集繼續四處𠝹女，佢喺阿Jim結婚前搞咗個王老五派對，搵啲索女返嚟玩制服誘惑，最後搞到個個剝光豬，而且佢又對艾斯頓古查（AshtonKutcher）前女友JanuaryJones扮演嘅Michelle超索細妹起痰，向佢展開猛烈追求。