市民高呼董建華下台，那末，有冇認真考慮，誰接任特首好呢？膚淺的我，經過深思熟慮，認為可行的人選，只有董1A一個！董1A之所以勝任，不是信口開河，乃係有根有據。
一董1A經常指指點點，有影子特首風範，接手駕輕就熟。二夠搞笑，谷到一肚怨氣的市民不會抗拒笑星。三1A比老董口齒伶俐，念口簧的能力較強。四沙士疫潮高峰，夠薑去重災區牛頭角下邨做騷。五騎呢沙士春裝的發明者，夠反面創意。六形象比保安局長優勝，沒有戴黑超扮ＷＩＢ。七衫褲尚算鬆身，不會貼身逼爆，令記者和讀者噴鼻血。八經常眼有淚光，冇機會目露兇光。九演技似好姨，師奶觀眾受落。十癲癲忽忽，表揚無厘頭文化。十一Navie闊太一個，跟地產商無利益轇轕。十二正牌土產，不會是第二個毛玉萍。十三斷估唔識上海首富係乜水。十四說話重複講三次，想誤導都難。十五記得千祈洗手，百毒不侵，沙士都死。十六不會彈起中指。十七香港人受夠鐵娘子，老來嬌都唔錯。十八刁蠻女特首，嚇窒廣東幫。十九1A都做到特首，使乜9A狀元？直接鼓勵年青人發圍。二十Betty個名勝在甜，香港人苦盡甘來了。廿一枕頭式接班，天下太平。廿二1A接棒，未到2007年中央已經反枱提出普選特首！廿三1A做特首，內閣專揀明星（除了汪明荃），考慮搵23號仔碧咸做局長，正斗咯！