七一遊行之後，引起好多人重新思索個人、社會與香港前景嘅問題。平時我哋香港人坐響酒樓茶室，溫度稍為高一度，就向部長投訴：「喂，冷氣唔夠凍喎！」但係七月一日，驕陽似火，三十二度高溫之下，竟然有五十萬人（或者更多），自願捱太陽暴曬，極有耐性，你話香港人在重要關頭，幾咁關心香港前途！
大賓架因為身份關係，唔可以參加遊行，佢對左丁山講：「都幾羨慕鄺其志，退休之後無憂無慮，就可以參加遊行。我就人在江湖，身不由己咯。接到李國寶寄嚟嘅二十三條問卷，你話點答，我又唔係私人選民冇自主權，正式嚟講，要開董事會研究，但啲董事點會就敏感政治問題表態吖，千祈唔好麻煩啲董事，所以唔答，私底下見到李國寶，就會請佢投反對票。」
馬會打吡廳新裝修完成，左丁山老友去試菜，左丁山作陪。喺地下酒吧飲兩杯先至上樓食正宗法國餐。酒吧內居然咁啱又碰到大賓架，大賓架飲咗兩杯，喟然歎曰：「回歸後越做越攰，生意難做，好客難求，舊客破產，你話幾頭痛，再遇上政府啲議而不決，官員無能而又夾硬嚟嘅作風，真係越做越心淡，想話及早引退。」
左丁山當然勸佢唔好，再做多十年先至退休，退休金豐厚好多，你估食死人乎？不過香港俾啲無能高官玩殘，又有時確係唔知可以做得幾耐。左丁山與大賓架互勉，有得做就做，做得幾耐得幾耐。