生態肥料生產商玖源集團（8042），雖然出現唔少阻滯，但終於都成功上市。上市兩日股價表現非常突出，噚日收0.53元，較招股價0.40元，高出32.5%。
經紀陳提醒小初，單睇成交股數只有1521萬股，成交金額787萬元，就知道隻股一如大部份中資創業板股，都係私人派對。
經紀陳話，玖源搞上市路途真係相當艱辛，由於搞上市之時，遇着有民企股出事，所以單係搞申請都搞咗好長一段時間，跟住到臨門一腳又搞得好唔愉快，圍飛之時遇到相當大阻滯，要延遲上市，但據講公司被查而要延遲上市的不利傳聞，其實根本冇咁嘅事。事件令到班大陸老闆甚為不悅，在最後關頭，終於搵到大陸炒家搞掂，先至成功上市。
今次玖源上市招股，發售1.28億股，其中1.068億股配售，其餘係公開發售。配售部份中，25名投資者就要咗99%，貨源歸邊成咁，隻股唔炒上先至係奇事。
至於日後表現如何？估計將如大部份中資創業板股，熱鬧多一段日子就會趨於平淡，但短期內股價向上炒的可能性甚高。
慕容小初