二十三歲的鄭洵，去年證實罹患血癌，醫生瞬即替他進行骨髓移植以保性命。惟近月阿洵癌病復發，令貧困鄭家承受沉重打擊，更為難以負擔阿洵接受化療的醫療費、及經常進出醫院覆診的交通費等支出，感到無助，盼善長伸出援手。
由於現時醫院仍未放寬市民探病措施，記者只能透過電話訪問正在留院接受治療的鄭洵。氣虛體弱的他細訴﹕「我啱啱做完第三次化療療程，要喺醫院休養同接受觀察起碼一個禮拜。呢兩日我冇再發高燒，但化療引致嘅後遺症，好似口腔潰爛、喉嚨痛得好犀利咁，都冇乜改善。𠵱家我食唔到嘢，飲水都覺得喉嚨痛，要靠吊營養水嚟支撐身體。」
原從事日本料理廚師的阿洵，去年證實患上急性淋巴白血病，屬血癌的一種。「我一向飲食正常，一年唔使睇一次醫生。舊年四月我開始有傷風咳，好耐都未好番，跟住無端端流牙血、兩隻耳聽嘢唔清楚，另外經常行幾步路就喘氣，重試過喺地鐵突然暈低。朋友介紹我睇專科醫生，經過照超聲波同抽骨髓檢驗之後，結果證實我患血癌。」阿洵黯然憶述。
去年聖誕節前，醫生為鄭洵進行近親移植骨髓手術，令當時生命危在旦夕的阿洵重拾生機，「我都幾好彩，喺屋企直系親屬之中，有三個嘅骨髓同我脗合，後尾醫生決定將我一位廿五歲哥哥嘅骨髓移植畀我。」
詎料癌魔近月再度襲擊阿洵，把他折磨得苦不堪言，且要為無力應付醫藥費與驟增的交通費支出憂心不已。「我已經返唔到工、冇收入，呢排重要畀錢留醫接受化療，出院之後又一定要經常返醫院覆診，加多一筆交通費開支，都唔知點應付！」按照目前政府醫院每日住院收費六十八元計算，阿洵迄今留醫接近一個月的診金需費超過二千元。
此外，為了避免細菌感染，阿洵每次往返醫院覆診都要乘搭的士，交通費支出不菲，令阿洵生活百上加斤。「我平日由長沙灣屋企搭的士去瑪麗醫院覆診，一程起碼要百幾蚊車費。𠵱家阿媽日日嚟醫院探我，佢來回就要轉幾程車，加埋嘅車費亦唔少。」
阿洵語調無奈地說，其任職文員的兄長近月加入失業大軍，胞姊則仍在進修求學，目前舉家主要靠鄭父在內地從事製衣廠工人勉強應付生計，經濟非常緊絀。
記者了解過鄭洵的苦況後，即時從蘋果日報慈善基金撥款五千元，助他應付醫療開支及交通費用，度過難關。
捐款編號﹕C1025
暖流熱線
電話：29908688
傳真：23702192
電郵：
網址：