五十萬人大遊行搞到老董陣腳大亂，中央搵咗香港一班政界人士田北俊、李家祥同李國寶上京。此舉究竟為乜？𠵱家重係言人人殊。有人話中央信唔過老董同中聯辦，要自己搵人問清楚，但有人講係阿爺幫老董箍票，叫班友咪亂說亂道。但上京者斷估唔會同記者交代全部內容，大家都只係估估吓。
有位商界老友向八方透露以下呢段銀行界傳聞：其中一位面聖者、東亞銀行主席李國寶，同佢相識咗二十幾三十年嘅老朋友港辦主任廖暉見面時，雙方除咗有傾香港近期大勢外，廖主任重好關心寶Baby間寶號喺內地嘅生意，重向佢親自打聽係咪搞得好大。
普通銀行家聽到廖主任咁「關心」自己檔生意，自不然會心中打個突，可能分分鐘唔知點答好；但寶Baby氣定神閒咁講，佢間寶號梗係掂喇，喺內地生意都一樣搞得掂，但點掂都好，內地生意都唔係佢自己嘅，係銀行嘅。言下之意係乜，盡在不言中，真係高手過招。
商界老友話，雖然面聖後之寶Baby片政府同葉劉好似冇之前咁出位，但阿爺要寶Baby歸隊挺董，都真係唔容易。
傳真︰2623-9278
電郵︰