Ballers必到勝地踩盡香港6大街場

籃球場就是英雄地；香港六大街頭球場就如戰場般（Battleground），每天上演成千上萬沒有獎金、獎品的街頭激戰，一班又一班「Ballers」（籃球好手）流盡汗水，施展平生絕學擊敗對手，只為了勝利帶來的喜悅，以及觀眾掌聲帶來的英雄感。可能在這些街頭戰場上，也曾留下你的足迹及汗水。　圖：李勇明?盧漢傑　文：盧漢傑

1.九龍區–黃大仙彩虹道球
場數目：2
有咩好：新興九龍街場勝地，年輕好手雲集，挑戰性高，加上鄰近有公共浴室、小食店、快餐店。
有咩唔好：遠離地鐵站，交通不便，而且鄰近馬路，打完波之後唔止要洗手，連波都要洗埋一份。
交通：★★★　設施：★★★★
環境：★★★　挑戰性：★★★★★
出沒球星：潘志豪（新青聯後衞）、翁萬特（新青聯後衞）

2.九龍區–旺角花墟球
場數目：3
有咩好：昔日街場勝地，但時至今日已魅力大減，毋須費時間跟隊；加上綠樹成蔭；浴室、小食亭一應俱全。
有咩唔好：從地鐵站和火車站出發，都要行十五分鐘先去到球場，交通不算便利；球場採傳統「石屎地」，球員唔小心跌親實損手爛腳。
交通：★★★　設施：★★★
環境：★★★★　挑戰性：★★★
出沒球星：黎耀恩（新青聯前鋒）

3.港島區–銅鑼灣維園球
場數目：4
有咩好：維園新裝修後場地好新淨，加上環境宜人，空氣清新，打起波都零舍醒神，緩跑徑長一千米，更有各式各樣健身設備，打波之餘更可健身。
有咩唔好：球場細，而且場與場之間距離窄，「救波」分分鐘踩親隔籬場啲人。而且只係得網球場的殘舊浴室，打完波想沖個靚涼，只好過馬路到附近高士威草地足球場。
交通：★★★★　設施：★★★★
環境：★★★★★　挑戰性：★★★
出沒球星：李偉倫（永倫前鋒）

4.港島區–灣仔修頓球
場數目：4
有咩好：灣仔修頓堪稱全港最勁街場，球員平均水準最高，場邊一排觀眾席，經常坐滿球迷，最適合喜歡「showboat」（演嘢）的球手；加上球場平坦，跌落地都無咁易受傷。
有咩唔好：講到明水準高，如果冇番咁上下技術，就隨時「跟隊」多過打波，而且附近冇公共浴室，最近都要行過兩條街去駱克道室內運動場，大熱天時身水身汗都幾麻煩。
交通：★★★★　設施：★★★
環境：★★★　挑戰性：★★★★★
出沒球星：譚偉洋（南華前鋒）、胡國鋒（福建後衞）

5.新界區–葵芳運動場
球場數目：3
有咩好：每晚球員會自發將其中一個場改成「五打五全場」，等球員唔使齋打三打三；球場鄰近地鐵站，交通方便。
有咩唔好：球場仍是傳統石屎地，又凹凸不平，球員容易受傷，而且冇地方沖涼，好唔方便。
交通：★★★★　設施：★★★
環境：★★★　挑戰性：★★★★
出沒球星：香振強

6.新界區–沙田源禾路
球場數目：4
有咩好：環境空曠，鄰近城門河，經常有涼風吹來，份外醒神；而且附近屋村林立，有好多大牌檔，最啱三五知己打完波之後去吹下水，擦番餐。
有咩唔好：距離火車站超過十五分鐘步行時間，途經巴士線不多，對非沙田區居民甚不便。
交通：★★★　設施：★★★★
環境：★★★★★　挑戰性：★★★
出沒球星：宗銘達（福建後衞）、吳華峰（福建中鋒）