爆機狂迷：
全港搶先測試XBOX版《RainbowSix》

PC第一身射擊Game王牌《RainbowSix》將會進軍XBOX，呢隻《R63》，一直冇乜人見過佢真身。小記日前有機會闖入Ubi香港總壇，發現隻測試版金碟，雖然完成度只得約六成，不過畫面已經超正，玩落發覺同歷代《R6》好唔同！
記者、攝影：朱崇德

發行：UbiSoft
開發：UbiSoftCanada
遊戲平台：XBOX
遊戲類型：第一身射擊
發售日期：2003（冬）

今次XBOX版係承接歷代《R6》，玩家扮演反恐部隊R6，到世界各地打擊恐怖分子。如果你係標準《R6》迷，一開機就會發覺好似好唔妥，事關佢少咗PC版開戰前長氣又譖氣嘅Briefing同作戰計劃！

遊戲版圖全新設計
Ubi香港負責人表示，大家可以將XBOX版當一隻新Game，事關為配合新平台機能，基本全個遊戲重新做過晒，單人模式所出現的14個版圖，以及多人對戰中的9個版圖，根本從未在PC版出現過，老手玩都有耳目一新嘅感覺！

遊戲故事改線性進行
遊戲玩法亦好唔同，玩家扮演反恐精英DingChavez，帶領4人突擊隊與恐怖分子對戰，遊戲改為「線性故事模式」，完成任務，上頭就會用無線電同你落新Order，比PC版「非線性模式」簡明好多。小記玩後認為骨子裏係《R6》，不過又有啲似同廠出品《SplinterCell》。由於測試版只有單人模式，所以未能測試連線對戰模式，預計同平時隊制玩法一樣，不過就要用XBOXLIVE玩，但12月香港能否開通，還要等進一步消息。

最新出M203爆彈槍
《R6》出名指令多，就算Keyboard都唔多夠使，XBOX版就要靠晒個手掣。向隊友發指令改為用圖表，用槍嘴指住不同地方，就會有不同指令表，例如指向地下會有進攻、留守等指令，門口會有開門、爆門突擊等，遊戲即時戰略性大增！
槍械跟足軍事權威TomClancy's嘅資料，30多支長、短槍都重新設定，出名如P90、FAMASG2、MP5等都落齊，後座力支支唔同，感覺好真實！不得不提從未出現過嘅M203爆彈槍，發射後做成一個火球，掂吓都要死！所有槍亦已配備在身，想隨時由輕機轉重機再轉Sniper都冇問題，夠晒彈性！