青島啤酒（168）股價高處未算高，跟住輪到哈爾濱啤酒（249）開車，最後粵海啤酒（124）亦郁埋，真係要講聲飲勝。
青啤噚日再創新高，升8.33%，收6.50元，哈啤只係微升0.93%，收2.725元，至於粵啤經過連日急升後，昨日升1.75%，收1.16元。
經紀陳話，雖然證券界向來係跟紅頂白，青啤絕對有可能升完再升，但佢睇好起步最遲嘅粵啤，覺得上升空間較大。
粵啤今年4月公布全年業績勁升，查實當時夠晒條件炒作，但直至最近先至起步，主要因為等大陸炒家埋位，有水到股價自然有反應，短短數日內，由0.80升至0.90元，之後一條氣殺上現水平。
粵啤炒作理由多多，可以炒策略性投資者入股，又可以炒合併或者炒落後，粵啤現價往績PE較青啤及哈啤為低，夠晒藉口炒高，所以有信心粵啤可以好似青啤咁升。
小初心諗，青啤由外資基金主導，而粵啤由大陸炒家揸旗，好似差少少喎。
慕容小初