高考放榜，名校狀元數目減少咗，於是一啲校長、高考狀元認為尖子入學（即會考六A生唔使考高考就在中六之後直入大學）不公平，一位拔萃女書院莫依玲同學對《大公報》話：「修讀中七並非浪費時間，能夠完成中七是件很偉大的事。」另外一位順利天主教中學六優生黃安溢對《大公報》話：「拔尖計劃削弱了中七學生入大學的機會。」
首先恭喜啲五A六A狀元，你哋考得咁好，自然覺得「偉大」，亦因此而有記者訪問。但你哋必須明白，無論你哋考試點叻，大學一年級一定好過喺中七讀書，大學嘅環境氣氛、師資、視野，遠非中七能及。當然，從經濟角度考慮，讀中七便宜過讀大學好多，但如果經濟許可（例如DGS聖保羅男女啲學生）的話，以尖子身份進入大學係最聰明嘅決定，留在原校讀中七就笨啲嘞。
現在讀中七，只係為咗到英國入大學，到加拿大、美國，根本唔使浪費時間，加拿大自下個學年開始，就實行中學三三制，中七不復存在。長遠嚟講，入到大學，讀完中七嘅學生未必成績好過讀完中六嘅學生。中文大學喺八十年代初實施暫取生制，相等於今日嘅「拔尖子計劃」，會考成績好嘅學生，當年讀完中六就可入中大。事實證明，啲暫取生入到中大，成績非常好，現於社會做事，普遍亦相當成功！奉勸今年會考成績優異嘅學生，如有機會做尖子，千萬不可放棄機會，唔好做笨仔笨女呀。