大市續在萬點水平拉鋸，恒指收市下挫44點，報9983，跌市成交縮至92億元，應屬好現象。
國企股亦見回氣，但唔少二三線股依然各自精采。例如快將同IBM搞大騷嘅文化傳信（343），就大升14%；冷門成衣股漢登集團（448）亦以大成交彈升12.5%，報2.7仙。
漢登前身係雅佳控股，現已變身為成衣股，同類股有德永佳（321）和思捷（330），由於漢登是以介紹形式借殼上市，而管理層亦好低調，投資者對其並不太熟悉，但由於漢登有機會成為基金股，而相比同類股又處於偏低水平，日後股價有頗大的上升空間。
漢登大股東係台灣孔金康家族及YGM貿易（375），今年初將HangTen時裝零售業務以9.13億元注入雅佳，借殼上市。HangTen係美國老牌服裝品牌，在亞洲有知名度，每年營業額逾10億元。
台灣為集團最大市場，其次為近年開拓的韓國，由於亞洲金融風暴後遺症影響，過去3個年度（3月年結），盈利表現未如理想，由00年度的1093萬美元下跌至02年度的856萬美元，而03年度的上半年，盈利333萬美元，跌勢未止。
不過，由於拓展韓國市場已見成效，期內韓國的銷售店舖增至超過100間，營業額1963萬美元，比前同期上升96.4%，而整體毛利率亦由52.5%增至56.2%，下半年度向上的趨勢持續，令全年盈利恢復增長，估計可達900萬美元，每股盈利（全攤薄）0.0026港仙，PE10倍，仍落後於同類股份。
成衣股的PE如思捷和德永佳，分別達24.3倍及16.7倍，漢登PE偏低，主要是公司新上市，未為市場熟悉所致。有芬佬話，佢哋已開始研究漢登，不排除日後有入股的可能性。
漢登發行股數雖有如天文數字，達271億股，但由於兩大股東係經重組而入主，股權分布極為集中，街外流通包括雅佳原有股東、雅佳債權人及重組顧問的貨源只約40億股，佔約15.2%，市值僅1億元，若然有三四個基金上車，即使食晒呢批貨亦唔夠喉，屆時股價必搶高，翻一番亦有可能。
郭兆誠