田少轉軚，香港逃過七九一劫，但噚日出現滿載乘客巴士墮山慘劇，釀成嚴重傷亡，香港在7月始終要經歷一劫，同時亦反映董建華為首的特區政府確係黑到無倫，真係要搵高人擺擺風水陣轉吓運。
九巴（062）發生如此嚴重事故，當然亦冇運行，股價跌0.50元，收36.20元。大股東新地（016）亦一度低見42.30元，最後收42.80元，跌0.40元，仍守在6月頂部之上。不過，以上意外事故對兩股應無實質影響，只是即時反應。
美股回吐，港股跌回1萬點之下收市，報9983，跌44點。港美股市均屬大漲小回，技術形態未轉壞，後市仍偏好。
倉內恒指Call輪9785由贏變輸，跌近計數位，今日若見跌勢持續，應先行計數在低位補回。
港股噚日下跌主要受滙豐（005）拖累，股價跌0.75元，收93.50元。收市後投資銀行WestLB調低滙豐投資評級，由「中性」至「跑輸大市」，而渣打（2888）則由「買入」降至跑贏大市，主因是香港樓價大跌後，銀行股有「極大潛力」壞帳撥備上升。
WestLB睇淡滙豐理由並無新意，不妨留意今日滙豐股價反應，若10日線跌唔穿，表示壞消息已反映，可趁機短炒一轉滙豐Call輪9632。
早前推介的海域（1220）、意科（943）等已調整完畢，回復升勢。意科的拍檔文傳（343）噚日已開車，相信稍後會輪到意科，0.31元水平可伺機買入。
趙飛雲