大熱天時想食甜品，Brownie、芝士餅、凍慕絲……多忌廉又高卡路里，太膩喎！咁朱古力批或蛋糕仔呢？製作過程要烘要焗，咪搞！咁不如跟靚靚OL嘉欣學整兩道創意夏日涼品，既不油膩又不需要烤焗，讓你由頭甜到入心，涼到落腳。
記者：楊一凡 攝影：周旭文
示範：嘉欣(北角讀者)
嘉欣的爺爺是大廚，並把入廚天份隔代遺傳給嘉欣，五年前她開始報讀甜品班，每次朋友生日及聚會便成了她的實習課。試驗結果往往得到一致好評，不過有次兩個食得挑剔的朋友，把嘉欣烹調的西菜踩得一文不值，好勝的她遂的起心肝，專攻西菜及甜品。五年下來，她終煮得一手正宗西菜，而她的廚房，亦放滿十數種香草、十數瓶洋酒及十數種廚具電器。
嘉欣最愛甜品，閒來最愛周圍食。食遍港九，她的推介如下：「山頂峰景餐廳的法式燉蛋及Tiramisu最好味，中式甜品一定係西貢滿記糖水。」嘉欣下個甜美目標是自己開設Cafe甜品店：「要係一間歐陸式小店，十幾個座位、每日自己做幾款甜品那種。不過開店前，我會去日本或法國的廚藝學校進修吓先。」
巿面上檸檬、青檸、荔枝、香橙、柚子雪葩……咩都有，唯獨不見雙拼口味的雪葩，嘉欣見檸檬具美白功效，柚子又人氣急升，不如就讓檸柚結合，讓柚子蜜的甜中和檸檬的酸，變成酸甜美味的夏日甜品。
檸檬 3個
青檸 1個
柚子蜜 200克
水 1杯（8安士）
蘆薈肉 適量
1.檸檬、青檸先榨汁，果汁可用同一個杯盛載。
2.把柚子蜜及水倒進檸檬及青檸汁杯裏，拌勻。
3.將混合好的檸檬柚子水，雪半個小時，然後注入雪糕機裏，拂打25分鐘，待液體變米黃色及凝成沙冰狀，便可取出，再放入雪櫃10分鐘。吃時可加入蘆薈肉作裝飾。
一次嘉欣在酒店吃過輕如空氣的疏乎里後，一直念念不忘，回家途經生果檔，瞥見果后當造，遂心念一動「做個山竹疏乎里都好噃！」但是，如何替山竹去核好呢？在家左試右試後，終於發現篩子原來是個好幫手，隔了核，配好魚膠粉份量，清新的凍疏乎里隆重登場。
山竹 12個
純味乳酪 2湯匙
蛋白 2個
幼砂糖 40克
魚膠粉 1湯匙
熱水 1/4杯（2安士）
生果及果仁碎 少許
1.先用熱水開魚膠粉，拌勻待用。
2.在篩子下面放個杯，把山竹果肉分批放入篩子中，用茶匙輕壓果肉，果汁咇出後順勢流到杯中，果核則留在篩子裏，簡單方便地榨汁。
3.把蛋白拂打至企身，需時約30秒，然後加砂糖，拌勻；把山竹果汁分數次加入，最後加埋純味乳酪及魚膠粉水，拌勻；然後分批注入杯中，放入雪櫃四個小時便可。吃時可放生果及果仁碎作裝飾用。
熱疏乎里經烘焗，賣相自然夠疏夠脹夠高聳，但凍疏乎里又應該點？呢個時候就要出動用錫紙圍杯邊，令杯身變高，然後才注入疏乎里漿，雪好後拆去錫紙，咁就搞掂嘞！
將檸檬、青檸溝柚子蜜嘅混合液冷藏成冰之後，因為柚子蜜含有糖份，所以混合液唔會太硬，可以用電動拂蛋器打鬆，打好之後再放入雪櫃二十分鐘。將打鬆再雪這個步驟重複四至五次，會令檸檬柚子冰變得鬆軟，這樣便可做成雪葩。