沙士過後，23條立法搞到50萬人上街，跟住又發生一宗大車禍，香港嘅愁雲慘霧不知何時才散？
好彩禍事雖然接踵而至，但對港股投資氣氛影響有限，港股仍在10000水平爭持，收報9983，跌44點，成交減至92.8億元。不過值得留意係即月期指未平倉合約接近8萬張，呢個月市況肯定會相當波動。據黑客講，大戶持期指好倉為主。
受匿名信投訴困擾嘅力豐（387），噚日掛牌股價先跌後升，收報0.85元，微升1.2%，成交則只得341萬元，似乎一眾捧場客都意興闌珊，但明知沽貨都好難搵人要，所以惟有hold住hold住，雖然股價企穩，但就唔知幾時至可以出到貨。
泰興光學（389）由7月初的3.875元急升至噚日4.175元收市，本來走勢不俗，但其間德意志銀行大手減持3120.4萬股，相當於7%股份。黑客又話，早前泰興光學曾先舊後新配售4000萬股，每股作價3.50元，呢批股份有足夠獲利空間，隨時會沽出市場，高追要小心。
最近有資金炒網股，新意網（8008）單日勁升24%，收2元。Cookie話，新意網中期賺3272萬元，手持現金及有息證券共18.5億元（扣除已償還7.4億元股東貸款，應該剩逾11億元），所以有投資者炒新意網派息，甚至派高息，因為新意網現時資本開支唔多，資金主要用作投資債券賺息，不如派高息益吓股東好過。
阿虎