推銷產品，包裝好重要，賣樓亦唔例外。信和上次賣完元朗帝庭居之後，又再出招，賣同樣喺新界區嘅屯門海典軒。今次又搞搞新意思，喺屯門市廣場售樓處，佔地兩萬呎，搞到成個白宮咁款。裏面有個六百幾呎嘅兩房，同八百幾呎三房示範單位。室外就整晒花花草草同水池，堪稱「水上白宮」咁話。
咁啱呢排天氣非常晴朗，售樓處又係露天嘅，而向戶外一邊全部用玻璃，喺外面都可以一眼睇晒室內環境，重有嗰盞極富氣派嘅水晶吊燈。若企喺售樓處外邊，抬頭望藍天白雲，差啲以為去咗外國㖭。
聽講，呢個「水上白宮」耗資千五萬，難怪咁有氣派。發展商話，日後會所，就係呢個售樓處嘅模樣。買家第日收樓時，就要留心吓個會所有冇走樣。
九倉葵涌Loft項目都會坊，以多用途概念為賣點，打正旗號吸納發展「創意工業」買家，例如廣告、電影、資訊科技同表演藝術等，呢類行業好着重創作空間。
個盤喺尖沙嘴海港城搞展覽廳，噚日開幕，九倉特別請咗廣告公司嘅創作總監Timothy（陳啟添）講感受。佢話，既然係創意工業，所以寫字樓都要整得特別啲，可以靈活運用空間，方便布置同擺放製成品。
Timothy又話，搞創作，只要靈感一到就可以開工，唔可以受時間限制，但一般商業大廈，夜啲就話熄冷氣閂門，咁樣好影響工作，所以佢好欣賞都會坊採用獨立冷氣同二十四小時管理。
𠵱家度橋搞商場推廣，要非常獨特先至有吸引力。蘭西知道，地鐵柴灣杏花新城聽日請嚟財經名嘴曾志英，搞個「你也可以成為哈利波特」嘅遊戲，吸引小朋友參加比賽，帶旺人流。
曾Sir搵一班知名人士做評判，包括演藝界名人黃百鳴、財經名嘴陸叔陳永陸、港交所前行政總裁鄺其志，同藝人張燊悅。
原來，KC（鄺之洋名）本身係哈利波特迷，睇晒五集小說，重同嗰仔鬥快睇，因此曾Sir即時度橋，搞多一個「成年版哈利波特」選舉，要在場嘅小朋友喺四位評判內，揀一個最似成年嘅哈利波特。
新地近年頻頻賣車位，蘭西收到料，佢哋今個禮拜日，會推出沙田帝堡城車位發售，每個十九萬蚊，重可以做到三成嘅二按，變相零首期。呢次發售係先到先得，買家重會獲送律師費同免佣。發展商安排嘅二按，首兩年免息供。
帝堡城共有一千二百二十三個住客車位，喺九八年時，每個車位要成三十三萬至三十七萬，後嚟為咗促銷單位，就搞咗個買單位可半價買車位優惠，都要十四萬蚊。𠵱家放盤不足十個，叫價十八萬至二十三萬。
中原講，最近做個車位以月租千六蚊租出，回報有十厘。聽聞發展商有幾百個車位。
另外，蘭西噚日講過中環國金二期，今日再補充一啲，聽講發展商新地同恒地，喺分樓方面好似重未傾掂數，有人估話，噚日新地請記者睇樓，最高係71樓，72到76樓唔開，係咪有玄機呢？
嘉里喺九龍灣有唔少物業，即將發售嘅有企業廣場三期，興建中嘅五期，其中一個構思係起酒店、商場同服務式住宅。為咗加強社區關係，發展商特別出咗一份企業廣場刊物，介紹區內未來發展。
嘉里印咗一萬五千份，噚日開始派畀九龍灣、東九龍，以至尖沙嘴區嘅商戶，刊物內容有商戶專訪、該區發展同購物禮券等。
蘭西
電郵地址：
