為甚麼財爺、保安局長與董特首賴死唔走。他們不肯落台的原因複雜，大家不妨估吓。阿蟲是因為：一遭田北俊搶喝了頭啖湯，冇癮。二自覺比田少上鏡十倍，信心爆燈繼續做男主角。三任內還想買多幾架Lexus，做吓頭條。四年紀太大，難轉工跳糟。五奶粉錢唔嫌多，搵埋個孫那一份。六屋企多個「小女人」，太嘈，唔想返屋企。七被讚情操高尚，飄飄然。八暗戀董特首。
保安局長不肯順應議員呼籲下台，原因是：一鍾意黑超look濃妝相經常見報。二聽慣噓聲，聽唔到會失眠。三買了很多貼身四季時裝，唔捨得擱在衣櫥等發霉。四喜歡鬧交。五有鋪怪癖，凡敵人反對的我堅持。六Enjoy座駕被圍時睇Time的歡樂時光。七唔使煮飯，大把時間「玩」市民。八跟阿蟲一樣，暗戀董特首，視阿蟲為情敵，誓要跟他爭寵。
輪到董特首，不肯落台的原因唔難估：一董1A唔批准。二辦公7-11，刻意避開「家有惡婆」。三做慣老闆，識敗家破產，唯獨唔明白甚麼是下台。四是美國卧底，布殊冇吩咐唔敢辭職。五反應慢五拍，以為五年後才請辭不會太遲。六鍾意畀面色民主派睇。七想眼袋更大些，等人用六位數字包佢示範眼肚纖體瘦身。八歡喜冤家，他暗戀的對象是李柱銘！