做人幾時都應該自強，曼城嘅科拿上季表現麻麻，就話自己今季要加操踢番昔日水準，點知歇暑期間佢就犯正七宗罪之一嘅「饕餮」，結果前日球隊開操，拖住發胖身形嘅佢，就俾領隊基瑾捉咗去「照肺」！
記得科拿上季曾經講過，話自己要喺今季提前開操，務求操番起昔日喺利物浦嘅射手勇態。可能呢位前國腳真係有提前開操嘅，不過淨係操個胃囉，喺假期暴飲暴食，結果搞到𠵱家身形亦脹大咗一個碼，真係自打嘴巴！又難怪佢嘅「伯樂」奇雲基瑾咁勞氣嘅！
我求大俠以前都幾欣賞科拿嘅射術㗎，不過佢上季去咗曼城跌晒WATT，希望佢好自為之啦！
咩叫做唔衰攞嚟衰？睇吓阿根廷足總最近搞嘅國家隊首奪世界盃二十五周年紀念賽就知！首先呢場波入場人數只得幾千人；場內場外充斥住嘅亦唔係球迷歡呼聲，而係人權組織聲討政府嘅吶喊；至於七八年世盃嘅功臣如甘巴斯、阿迪尼斯及巴薩里拉等，一個都冇到，乜咁唔畀面呀？
以前啲人就話香港有金執，𠵱家我求大俠就話祖國至係遍地黃金！睇吓一班頗具名氣嘅歐美球員，最近都紛紛走過嚟中國搵班落。其中杜夫亭算好彩數，終於獲得甲A球隊天津康師傅聘用。前尼日利亞國腳巴班基達，以及喺艾拉維斯失意嘅羅馬尼亞前鋒莫拉，就仍然等緊。
啱啱由布力般轉會去新升班球隊李斯特城嘅基利士比，就同大家「解釋」，話離隊原因主要係同領隊桑拿士唔啱傾！佢話計埋日前亦轉咗會去伯明翰嘅鄧尼在內，球隊總共有十幾個人唔妥桑拿士。聽落又唔似流料喎，高爾同埋約基都試過同桑拿士唔咬弦，照咁睇，真係要快啲換領隊至得囉！
南美足球圈唔知係咪有鋪「用重典」癮頭呢？智利一代球星森莫蘭奴返咗祖國踢波，喺一場比賽中對球證「動手」，結果被判罰停賽十一場；巴西乙組聯賽又有個龍門同樣對球證郁手郁腳，又被判罰停賽一百八十日！問題在於邊度呢？係啲球員太躁火？定係球證水準有問題？