一直以嚟PS2嘅中文化遊戲都停留喺一啲動作或者智力遊戲上，好似《ICO》、《阿格斯戰士》等，字都唔多隻，PS《射鵰英雄伝》咁嘅RPG就真係欠奉，超級大作中文化就更加唔使諗，不過今個星期推出嘅SEGA大作《櫻花大戰熾熱之血》，就有望改變PS2中文化遊戲命運，希望日後連《FinalFantasy》等大作都會陸續中文化，咁就真係機迷之福！遊戲定價$285絕對唔貴，點都要支持下！8月重有隻中文化嘅Namco大作《TOD2命運傳說》殺到，多多留意。
今個暑假鍾意鍊車嘅機迷真係唔得閒，《頭文字D》6月尾上場，7月頭又有CAPCOM隻《automodellista》卡通賽車，以隨街「挑車」為賣點嘅《首都高》系列，新一集又會喺7月24日推出，由於Genki廠已被Konami收購咗，所以今集香港亦會有行貨推出，定價約$388，今次大家就唔使捱貴貨啦！
靜咗一排嘅任天堂今個星期就有瑪利奧同卡比撐場，GBA嘅《瑪利奧兄弟》今次出到第4集，玩法就以完全移植超任版為賣點，入面重加送兩張e-card，市價約$280。GC《星之卡比》就約$320左右，下星期GC重有任天堂吉祥物比卡超登場，三對手㩒住你嚟搶！