自由黨創黨主席李鵬飛，因為唔同意田北俊刪去黨章內寫明○七年達至普選目標，毅然退黨，飛哥話「道不同，不相為謀」；封簡短嘅退黨信交到主席田少手，佢當然好嬲飛哥，重差啲冇朋友做。
點知田少最近做番齣好戲，兩兄弟又冰釋前嫌，做番老友記，「田少𠵱家唔嬲我啦！」飛哥笑住咁同八方講。
飛哥話，好多人都以為佢係田少背後嘅高人，其實絕冇此事。據佢認識嘅田北俊，一定冇想過要利用今次辭行會、押後23條做人民英雄；田少只係過唔到自己個關，就係覺得如果五十萬人上街仍然無動於衷，實在對唔住港人。
飛哥話，田少唔單止冇諗過要做英雄，亦冇諗北京嘅反應或者中聯辦嘅反應，你可以話佢冇諗後果。當然田北俊今次肯定係救咗香港。
至於田少重有冇機會問鼎第三屆特首，飛哥話點知啫。佢又大罵老董蠢，田少請辭，執政聯盟不再存在，佢重係拒絕改組；北京等唔切，已經派人嚟收料，問應該點收科。
李鵬飛當年參加直選雖然失敗，但係佢仍念念不忘四處拍門爭取選票嘅艱辛日子，「我信奉民主，鍾意民主，唔係就唔使行到對腳到腫埋，老婆要煲夏枯草畀我浸腳。」佢預言，如果北京到○七年都唔畀港人直選特首，就更多人上街。
講開老婆大人，飛哥忍唔住爆咗老婆7.1嗰日都有去遊行，重同個女婿喺維園困咗四個鐘先出發，八方聽聞，除咗飛嫂、周梁淑怡個女，楊孝華個仔都有去遊行，唔怪得咁墟冚！
傳真︰2623-9278
電郵︰