大市終於透透氣，恒指挫44點，成交縮至92億，典型大漲小回格局。恒指9800水平支持力強，等跌多百零點，就郁手買Call輪。
滙豐（005）續軟，唔見咗3格，收報93.5元，開始接近支持位，股價若見92-93元，係收集滙豐Call輪好時機。
最抵買嘅滙豐Call輪，始終係9632，現價59仙，重有兩個月壽命，溢價僅0.4%，槓桿率15.9倍，一啲都唔輸蝕。缺點係成交較疏，買賣要有耐性。
鍾意快買快賣，末日輪9631可以考慮，下月8日到期，溢價2%，槓桿率37.6倍，成交活躍過9632，上落亦較大。
其他藍籌Call輪，如長實輪9764、和黃輪9606同恒地輪9787，都可以吼低收集。
大市雖調整，個別股仔照樣炒到出煙。文化傳信（343）有消息，股價大升1成4，收報28.5仙，成交逾5千萬元。文傳有件公司輪2306，掛牌僅3日，昨收11.4仙，升幅同正股一樣，都係14%。2306好長命，05年7月至到期，但已有負溢價2.1%，槓桿率唔大，但都有2.5倍。
隻輪咁快有負溢價，一係代表抵買，一係意味正股升勢接近尾聲。
章盛