鄭中基昨日與Stephy、王合喜、黃泆潼及導演谷德昭等，齊往赤柱拍攝新片《龍咁威》。有傳黃泆潼在片中的角色本由安雅飾演，但鄭中基卻嫌安雅因服搖頭丸而勒戒，形象差，怕遭拖累故要求電影公司換人，鄭中基昨得悉此事後大為勞氣，更揚言一定要揪出亂作料的幕後黑手。
鄭中基、MiniCookies的鄧麗欣（Stephy）、黃泆潼、王合喜及新人潘美琪等人，昨日在導演谷德昭帶領下，前往赤柱聖士提反灣拍攝新片《龍咁威》。昨日拍攝的劇情是講述身為警察的鄭中基與Stephy，齊齊監視攬着兩名比堅尼女郎一起曬太陽的大賊王合喜，鄭中基因暗戀Stephy而不時與對方搭訕，以致被王合喜發現及揶揄。
「個個入我數咪好唔得閒」
而鄭中基受辱後，便偷偷將其中一名比堅尼女郎黃泆潼的太陽油，換成火酒作報復，當黃泆潼為王合喜塗抹後，正在抽煙的王合喜便突然全身着火，即時要跳入海中滅火。
有傳《龍》片乃黃柏高與嘉禾合作投資，所以片中不少角色都起用嘉禾演員，本來黃泆潼的角色是由安雅飾演，但因鄭中基覺得安雅形象差，惟恐會影響自己的形象，所以要求換人。鄭中基昨日聞言勞氣地說：「唔係嘛？又關我事？選角係導演揀㗎嘛！佢換唔換人唔使通知我，我亦冇聽過呢單嘢，套戲咁多角色，個個都入我數咪好唔得閒，使唔使乜都擺我上枱呀？你不如問谷德昭啦！究竟邊個亂放料呀？畀我知係邊個我實追究。」問鄭中基可會覺得安雅形象差時，他說：「唔好咁話人啦，我同佢唔熟，唔知咁多嘢呀。」
黃泆潼怕熱寧着三點式
而黃泆潼昨日穿上比堅尼泳衣示人，相比之下，較其他演員舒服涼快，她說：「我寧願着三點式，着衫咁辛苦，俾啲汗黐實晒。」黃泆潼形容她在該片中只是「嚴重客串」，全片只得幾個鏡頭的戲份，但仍願意穿三點式上陣，她說：「導演睇得起我，肯用我咪冇所謂囉！我喺《新紮師妹》都着過，拍旅遊特輯都要着，都唔介意嘅！」
昨日天氣炎熱，鄭中基身穿毛巾大褸及牛仔褲，邊拍邊流汗，而穿着背心和長褲的Stephy也熱得連心口都冒汗，二人不用埋位時便食雪條消暑。正當鄭中基等人熱得無精打采之際，李燦森與張達明竟帶着樋口明日嘉和蔡安蕎乘坐快艇到場探班。
蔡安蕎樋口探班賣大包
李燦森等人更在一旁開始玩起滑水來，令鄭中基忍不住苦着臉笑罵說：「真賤格，我就熱到死開工，佢放假就嚟晒命，話探班其實嚟引我，我都好想落水呀！」昨日蔡安蕎與樋口均穿比堅尼泳衣加短褲相當清涼。
而Stephy接受訪問時說：「好熱呀，由頭到腳都滴汗，心口都滴呀！好彩今日唔使着軍裝，我搽晒太陽油呀！」Stephy表示因自己在戲中飾演一名不苟言笑的女警，所以對白甚少。 採訪：胡比 攝影：陳志嵐
