收到風，阿仙奴打算同荷蘭前鋒伯金續約一年，但你估「兵工廠」開咩新條件畀佢？一萬四千鎊（約十八萬港元）周薪是也！伯金大概搵開三萬幾鎊周薪，如果留隊變相減薪超過一半，難怪佢扯晒火。我求大俠都覺得阿仙奴好離譜，想人走有好多方法啫，唔使出個咁嘅價錢侮辱人啩？
雖然伯金已經三十四歲，但以佢波底至少可以響高水平比賽多一兩季，阿仙奴會方咁降人身價法真係有點不近人情。換個角度諗，阿積士一直搵尹巴士頓搭路希望邀伯金回巢，阿仙奴咁做可能幫咗阿積士一把。
講開阿仙奴，查實佢哋前鋒兵力唔可以話好充裕，佢哋簽基維爾已經無望，如果連伯金都走埋，阿仙奴擁躉都咪話唔擔心。
富咸班主阿法耶茲呢幾年喺富咸身上使咗大概十三億港元，希望將呢間細會變成倫敦市嘅「曼聯」，結果「曼聯」變唔成，變成「玩完」！事關𠵱家球會負債纍纍，球迷不滿球隊表現，新一季季票又滯銷，阿法耶茲意興闌珊準備賣盤。梗係啦，再咁落去容乜易破產㗎！
皇馬已落實會喺「八．八」在大球場對中、港聯隊，我求大俠忽發奇想，早前就有個外國網站，用數據計過，指港隊前鋒歐偉倫係今年世上最佳前鋒，排名叻過朗拿度同魯爾㖭！睇嚟今勻三位「世界級前鋒」同場較技，到時都咪話唔精采，真係要搵人幫手撲飛至得囉！
瑞典業餘球會赫加堡個班主卡爾臣，日前就話同「瑞典之寶」拿臣識於微時，遲啲同些路迪約滿後，拿臣會履行之前嘅承諾，免費免人工過檔效力！計我話拿臣講呢番說話嗰陣都可能未成名，𠵱家人哋未必重同你赤子之心，重要係「義工」無糧出？呢單料都係笑吓就算嘞！
皇馬準備響智利開間體育學校，分別開辦足球班同埋籃球班，美其名係幫助彼邦發展體育，實情當然係搭好路，方便將來揀蟀。對於一啲過氣名將嚟講，呢個絕對係好消息，因為聽聞皇馬正積極物色當地教波人選，好似森莫蘭奴呢啲老將，無疑多咗個搵食機會。