大市在萬點水平爭持，恒指收市升34點，成交重好暢旺，有126億元，市場資金仍以國企同紅籌為追逐對象，國企指數就大升121點，升幅4.3%，成交更增至27億元，基金同大行重係一路收集，基金揸得較重嘅國企，升勢更一發不可收拾，電力股以北京大唐（991）最勁，大升8.5%，石化股跑出北京燕化（325），大升14.5%，至於鋼鐵股則暫時唞一唞氣。
除國企紅籌外，科技同網股都好勁，香港有中資股可捧，外圍則科技股已炒到熱火撩天，網股升幅更達兩倍多到4倍不等。新意網（8008）同香港網（8006）噚日亦揚長而上，前者大升11%，後者升6.6%，成交則約4000萬股，大增逾倍，兩者都見有大行同基金收集。過去兩月，香港網走勢形成雙底，頸線在0.85元，若今日成交再熱，破位而上機會甚大，目標1.1元。
香港網收購的無線服務供應商掌中萬維，今年已有盈利貢獻，掌中萬維新近與中移動旗下河北、雲南、甘肅和新疆等4個省份簽訂服務協議，進一步加強與中移動集團的合作，而與無線電話網絡商合作提供服務的省份已增至26個。
大市轉旺，唔少股票已大升，但亦有唔少股價重係好偏低，就好似第一天然食品（1076）就抵買到極，早幾日，佢曾經升上0.56元，之後落番0.5元整固，係突破長期阻力嘅後抽，噚日落到0.485元即反彈高收，且成交大增，旗形整固完成，升浪再起，短期上升目標0.62元，中線可見0.75元，預期升幅達50%。
第一天然股價偏低，即使升50%亦唔太過，因為PE重係好低也。02年（12月年結），集團營業額3.37億元（人民幣．下同），升23%，盈利1.09億元，升25%，每股盈利0.14元。03年，盈利料上升到1.3億元，每股盈利0.162元，現價PE只係3.3倍，即使股價升上0.75元，PE亦只係4.9倍。
第一天然係基金股，近期炙手可熱的惠理基金（VP），揸住8.9%，WisdomLatch亦揸住8.1%。重有，集團申請的歐盟認證，獲批應冇問題，日後產品輸歐大增，盈利重會高增長。
郭兆誠