形勢依然唔錯，恒指升34點，守住一萬點大關。連升3日，共進帳391點，可能需要透透氣先至再上。和黃（013）曾上破50元，收49.80元，升20仙。以前講過，評級公司將和黃信貸評級調低，好事多過壞事，因為呢啲評論或者係大股東增持和黃嘅導火線，結果由上月16日至本月初，長實（001）5度增持和黃。
個市唔會直線上升，和黃亦係，吼住和黃軟軟哋之時，吸納相關Call輪，博大市再好帶動和黃，亦可博大股東增持和黃。正路對象有9606同9765，9606下月初到期，現價1元，溢價0.4%，槓桿率5倍，睇落似乎冇乜爆炸力，但勝在幾乎平水。9765則係9月到期，現價30仙，溢價4.4%，槓桿率16.6倍，屬於搏殺格。
長實昨升50仙，叻過和黃少少，有機會跑快過和黃，長實Call輪可以揀嚟買，始終離唔開9764同9829。前者啱穩健些少嘅股民買入，後者啱大上落鍾意刺激嘅炒家落手。
3件石油股，獨中海油（883）下跌，收12.05元，唔見20仙，吼低買相關Call輪，博中海油遲早上番去，對象係9535，年底到期，現價21.9仙，溢價2.7%，槓桿率5.5倍，有3球幾易手，買賣唔算困難。唔嫌交投靜，可以揀9737，下月到期，現價1.57元，溢價1%，槓桿率7.7倍。
章盛